HS Orka rekur nú tvö orkuver í Svartsengi og á Reykjanesi. Kjarnastarfsemi þeirra hefur verið í framleiðslu á rafmagni og heitu vatni. Vegna heppilegrar staðsetningar og einstakra aðstæðna er mögulegt að nýta afgangsstrauma frá orkuverunum til fjölbreyttrar framleiðslu. Meðal fyrirtækja sem njóta góðs af starfseminni má nefna Bláa Lónið og snyrtivöruframleiðendur, auk líftækni- og fiskeldisfyrirtækja.
Auðlindagarðurinn sem þróaður hefur verið í nágrenni orkuvera HS Orku á Suðurnesjum er einstakur í sinni röð. Hann boðar nýja framtíðarsýn og hvetur til enn frekari þróunar á nýtni afgangsstrauma frá orkuverunum.

Ný hugsun
Auðlindagarðurinn hefur sannað gildi sitt, sem sést þegar litið er til fjölda fyrirtækja í nágrenninu sem nýta affallið frá orkuverunum til eigin framleiðslu. Vaxtarmöguleikarnir eru nær óendanlegir og er Auðlindagarðurinn tilbúinn í samstarf við fyrirtæki með starfsemi á borð við lóðrétta gróðurhúsaræktun, þörungaræktun, fiskeldi og jafnvel annan sjálfbæran rekstur sem vitum ekki enn af! Auðlindagarðurinn á Reykjanesi býður samkeppnishæft verð á endurnýjanlegri orku og sjálfbært frárennsli frá orkuverum sínum, auk skilvirkra flutningsleiða til meginlands Evrópu og Norður-Ameríku.

Hugmyndasmiður Auðlindagarðsins
Albert Albertsson er hugmyndasmiðurinn að Auðlindagarði HS Orku fæddist árið 1948. Sem ungur drengur varð Albert hugfanginn af indíánum og þá sérstaklega hugmyndafræði þeirra um að ættbálkarnir veiddu aldrei meira en þörf var á. Að þeir skildu eftir sig sem fæst fótspor og gengu ekki of nærri móður jörð. Albert heillaðist einnig af svokölluðum svartstrókum (e. black smokers) sem eru neðansjávar hverir sem spúa heitum jarðhitavökva út í kaldan sjóinn. Þótt vökvinn sé eitraður myndast fjölskrúðugt líf í kringum hann.

1755 – Fyrstu tilraunaboranir á jarðvarmasvæðum
Íslenskir frumkvöðlar fóru snemma að velta fyrir sér hvernig nýta mætti náttúruundur jarðvarmans enda lega Íslands á flekaskilum Ameríkuflekans og Evrasíuflekans einstök.
Eggert Ólafsson skáld og náttúrufræðingur og Bjarni Pálsson landlæknir voru brautryðjendur í jarðhitarannsóknum. Þeir lögðu upp í rannsóknarför um landið árið 1752 og ferðuðust um landið í ein sex ár. Rannsóknir þeirra voru þær merkustu sem gerðar höfðu verið til þess tíma. Þeir lýstu meðal annars hverum, brennisteinsnámum og ölkeldum víða um land.
Árið 1755 gerðu Eggert og Bjarni tilraunaboranir við Laugarnesið í Reykjavík í þeim tilgangi að kanna jarðlög vegna brennisteinsvinnslu. Ári seinna gerðu þeir aðra tilraun til að bora eftir brennisteini í Krýsuvík.  Ekki varð þó af almennri nýtingu jarðvarmans fyrr en nokkru seinna.

1930 – Boranir eftir heitu vatni í Laugardalnum hefjast
Jarðvarminn var notaður til að hita upp skóla, sjúkrahús, sundlaug og sextíu hús í austurbæ Reykjavíkur. Nýting jarðvarmans var augljóst framfaraskref og húshitun í Reykjavík varð til þess að aðrar sveitastjórnir horfðu til þess að auka húshitun með jarðvarma.
Árið 1953 samþykkti bæjarstjórn Keflavíkur að veita 20 þúsund krónur til rannsókna á hitaveitu. Árið 1971 voru 98% Reykvíkinga komnir með hitaveitu.

1974 – Hitaveita Suðurnesja stofnuð
Hitaveita Suðurnesja var stofnuð 31. desember 1974, með lögum frá Alþingi, í þeim tilgangi að nýta jarðvarmann til húshitunar á svæðinu. Árið 1975 var fyrst borað eftir köldu vatni og varmaskiptastöð reist í Svartsengi. Sama ár varð Ingólfur Aðalsteinsson ráðinn sem fyrsti starfsmaður fyrirtækisins en hann tók síðar við sem forstjóri. Bráðabirgðastöðin við Svartsengi var gangsett árið 1976 og heitu vatni hleypt á félagsheimilið Festi í Grindavík fyrst húsa á Suðurnesjum. Albert Albertsson hóf störf sem yfirverkfræðingur hjá Hitaveitu Suðurnesja árið 1977. Önnur merk tímamót í sögu fyrirtækisins voru árið 1978 þegar raforkuframleiðsla með jarðvarma hófst með gangsetningu tveggja 1MW gufuhverfla.
1980 – Bráðabirgðaaðstaða sett upp við Bláa Lónið
Samhliða starfsemi Hitaveitu Suðurnesja og virkjun jarðhitavökvans í Svartsengi myndaðist fagurblátt lón úr jarðhitavökva virkjunarinnar. Snemma varð vinsælt að baða sig í vökvanum enda hæfilega heitur. Valur Margeirsson var fyrstur til að átta sig á jákvæðum áhrifum jarðhitavökvans á psoriasis og jókst umferð psoriasis-sjúklinga í lónið mikið í kjölfarið. Þessi þróun var með öllu ófyrirséð þegar lónið tók að myndast og skömmu síðar sá Hitaveita Suðurnesja engan annan kost en að koma upp bráðabirgðaaðstöðu við lónið fyrir almenning.
Gamalt líkhús var flutt úr Keflavík og sett upp til afnota fyrir gesti lónsins. Líkhúsið tók við af litlum skála sem settur hafði verið upp af verktökum og var í daglegu tali kallaður Hrúðurkallakot. Lónið fékk fljótt nafngiftina Bláa Lónið.

1990 – Fiskþurrkun hefst á Reykjanesi með gufu frá jarðhitasvæðinu
Skreið er framleiðsluheiti yfir þurrkaðan, afhausaðan fisk. Íslendingar hafa þurrkað fisk í aldaraðir og áður fyrr var skreiðin mikill þáttur í neyslu landsmannna og einnig sem verslunar- og útflutningsvara. Öll skreið síðustu aldar hefur verið framleidd til útflutnings. Margar fiskþurrkanir má sjá við Reykjanesskagann. Nýting jarðhita til þurrkunar fiskafurða hófst á Reykjanesi árið 1990. Íslenska ríkið hafði borað nokkrar tilraunaholur á Reykjanesi í þeim tilgangi að athuga með fýsileika jarðvarmavinnslu á svæðinu. Hitaveita Suðurnesja tók svæðið seinna yfir og byggði þar orkuver. Með aukinni nýtingu jarðvarmans umhverfis jarðvarmaver Hitaveitu Suðurnesja komst skýrari mynd á Auðlindagarðinn. Fjölnýtingarhugsunina og möguleikar hennar til að stuðla að sjálfbærri þróun samfélagsins fóru að mótast betur í huga Alberts Albertssonar. Nú eru tvö fyrirtæki á Reykjanesi sem sérhæfa sig í þurrkun fiskafurða og nýta jarðhitann sem kemur frá jarðvarmaveri HS Orku.

1992 – 2006 – Jarðvarmaverið á Reykjanesi tekur til starfa
Raforkuframleiðsla hófst í 100 MW jarðvarmaveri á Reykjanesi. Nýtt jarðvarmaver opnaði mikla möguleika á stækkun Auðlindagarðsins og rúmlega tvöfaldaði afl- og orkugetu fyrirtækisins. Sama ár var tekin fyrsta skóflustungan að 30MW stækkun í Svartsengi með byggingu 6. áfanga jarðvarmaversins. ORF Líftækni gerði fyrstu virknimælingarnar á vaxtaþætti framleiddum í byggi sem lagði grunn að starfsemi fyrirtækisins. Íslenska ríkið tilkynnti um ákvörðun sína að selja hlut sinn í HS hf. Rafaflsframleiðsla HS Orku var í lok árs um 145 MW.

2008 – 2014 – Framtíð Auðlindagarðsins
Í fyrirtækjum garðsins felast miklir þróunar- og vaxtarmöguleikar sem grundvallast á reynslu þeirra, rannsóknum og þróun aðferða og nýrra afurða. Fyrirsjáanlegt er að fleiri fyrirtæki, og þá af öðrum toga en þau sem fyrir eru, muni leita inngöngu í garðinn og þar með styrkja hann. Mikilvægt er að ímynd Auðlindagarðsins sé gegnsæ og skýr og samhljómur milli fyrirtækjanna sem í garðinum starfa svo og þeirra sem inn í garðinn koma.