Blikksmiðja Guðmundar ehf. var sett á legg þann 1. apríl árið 1975. Nafnið er dregið af stofnandanum Guðmundi Jens Hallgrímssyni, blikksmíðameistara fæddum á Akranesi árið 1941. Núverandi aðsetur að Akursbraut 11b var tekið í notkun árið 1992 en árið 2016 flutti hluti starfseminnar yfir í næsta hús og telur nú heildar umfang fyrirtækisins á fimmta hundrað fermetra húsnæðis. Eigandi Blikksmiðju Guðmundar er Sævar Jónsson, blikksmíðameistari. Hann hóf störf hjá fyrirtækinu árið 1996 og hafði þá áður unnið hjá Blikksmiðnum hf. í Reykjavík í ein 10 ár og lært sína iðn þar. Sævar keypti síðan blikksmiðjuna af Guðmundi í upphafi ársins 2007 og rekur hana í dag. Árið 2013 lauk sonur Sævars, Emil Kristmann, námi í viðskiptafræði frá Birmingham-Southern College í Alabama og var fastráðinn í starf aðstoðarframkvæmdastjóra en hann hafði starfað hjá Blikksmiðju Guðmundar sem sumarafleysingamaður frá sumrinu 2007. Emil lauk MCF prófi á meistarastigi í fjármálum fyrirtækja frá Háskólanum í Reykjavík árið 2015 og gegnir hann nú stöðu framkvæmdastjóra.

Starfsemin
Það má segja að lykillinn að farsælli vegferð blikksmiðjunnar í dag sé tilvera Elkem á Grundar-tanga og álvers Norðuráls á sama svæði, en stór hluti af rekstrinum fer í að þjónusta þessi tvö fyrirtæki. Aðrir stórir viðskiptavinir, eru Ríkiseignir, BM Vallá og Akraneskaupstaður. Að öðru leyti nær þjónustusvæðið um allt suðvesturhorn landsins og í því tilliti hefur fyrirtækið t.d. tekið að sér uppsetningu stórra loftræstikerfa í Hótel Skugga á Hverfisgötu og nýrri þjónustumiðstöð Kaupfélags Borgfirðinga í Borgarnesi. Blikksmiðja Guðmundar ehf. er vel tækjum búin til að taka að sér verk af öllum stærðargráðum. Á smiðjugólfinu er t.d. nýbúið að taka í notkun afar fullkominn fjöllokk frá ítalska framleiðandanum Euromac. Slík undratól hafa ekki síst nýst vel þegar inna þarf af hendi sérsmíði af ýmsum toga eða fjöldaframleiðslu á einstaka hlutum. Upp á síðkastið hefur fjöllokkurinn framleitt skúffur í forsteyptar einingar hjá BM Vallá Smellinn og hlífðarlista í plötufrysta frá Skaganum 3X.

Starfsmenn og framtíðarmarkmið
Hjá Blikksmiðju Guðmundar starfa í dag, að jafnaði 10 manns. Meðaltalsvelta á ársgrundvelli er á bilinu 200-250 milljónir króna og hefur það verið haft að markmiði að lækka langtímaskuldir félagsins jafnt og þétt. Sú vinna er byrjuð að skila árangri en árið 2018 var til að mynda í fyrsta sinn í sögu fyrirtækisins sem Blikksmiðja Guðmundar var á lista Creditinfo yfir Framúrskarandi Fyrirtæki. Miklar tækninýjungar hafa orðið á loftræstibúnaði undanfarin ár og hefur fyrirtækið gætt þess að starfsmenn þess hljóti reglulega endurmentun á þeim sviðum til þess að geta boðið hagkvæmustu lausnir sem völ er á hverju sinni, sem skilar sér í auknum endingatíma og minni viðhaldskostnaði.
Vefsíða: blikkgh.is