Eirberg ehf. byggir vöruframboð á faglegum grunni þar sem starfsfólk kappkostar að veita afbragðs þjónustu. Verslanir Eirbergs njóta sérstöðu hvað vöruval og gæði snertir þar sem góð upplifun viðskiptavina er mikilvæg. Lögð er áhersla á innflutning og sölu vandaðra vara til að efla heilsu og almenn lífsgæði; vörur fyrir útivist og umhverfisvænan lífsstíl; ásamt snjall-tengdum búnaði og stuðningsvörum sem auðvelda daglegt líf og styðja heilsumarkmið einstaklinga.

Starfsemi og stjórnendur
Eirberg Stórhöfða býður fjölbreytt vöruval í glæsilegri verslun með góðu aðgengi. Heilbrigðismenntaður starfskraftur er til staðar sem veitir faglega ráðgjöf.
Eirberg Kringlunni býður vinsælustu vörurnar okkar á hverjum tíma. Verslunin er staðsett á fyrstu hæð við opið torg þar sem hægt er að slaka á með fjölskyldunni.
Vefverslunin eirberg.is er vaxandi og með fjölskrúðugt vöruframboð. Verslunin nýtur þeirrar sérstöðu hér á landi að bjóða 365 daga skilarétt þegar verslað er á vefnum.

Eirberg er rótgróið fjölskyldufyrirtæki sem á rætur að rekja til Ó. Johnson og Kaaber hf. sem stofnað var 1906 og Hjálpartækjabankans. ÓJ&K og Össur hf. stofnuðu Eirberg í lok árs 2000 þegar Heilbrigðisvörudeild ÓJ&K og Hjálpartækjabanki Össurar runnu saman í eitt fyrirtæki sem ætlað var að sækja fram á heilbrigðismarkaði og útvíkka sameinaða starfsemi með auknu vöruframboði. Starfsemi þessara tveggja rekstrareininga sameinaðist undir merkjum Eirbergs ehf. fyrsta janúar 2001. Agnar H. Johnson gegndi stöðu stjórnarformanns frá stofnun og tók nokkru síðar einnig við starfi framkvæmdastjóra. Hann er nú eigandi og starfandi stjórnarformaður, Kristinn A. Johnson er framkvæmdastjóri og Rannveig Guðmundsdóttir er fjármálstjóri.

Hinn 1. janúar 2018 flutti heilbrigðissvið Eirbergs yfir í nýtt systurfélag, Stuðlaberg heilbrigðis-tækni ehf. Eirberg hafði vaxið og þróast frá því að vera miðstöð hjálpartækja yfir í að bjóða einnig vörur til heilsueflingar og bættra lífsgæða. Við stofnun Eirbergs var fjöldi starfsmanna 10 en 20 árum síðar var fjöldinn kominn í 40 hjá fyrirtækjunum tveimur.

Eirberg
Nafnið Eirberg er samsett orð sem kemur úr norrænni goðafræði en þar segir frá lækningagyðjunni Eir sem var ein af meyjum Menglaðar. Menglöð, sú hin sólbjarta, hefst við á Lyfjabergi með meyjum sínum þar sem sárir og sjúkir fengu lækningu meina sinna. Til gamans má benda á að Lyfjaberg er yfirleitt sýnt sem stuðlaberg.

Markmið okkar eru að efla heilsu, auka lífsgæði, auðvelda störf og daglegt líf.