GG Verk ehf. er framsækið byggingafyrirtæki sem var stofnað árið 2006 af bræðrunum Gunnari og Helga Gunnarssyni en þeir eru þriðja kynslóð smiða í fjölskyldu sinni og búa því yfir áratuga reynslu í faginu.
Fyrirtækjamenningin ber þess enn einkenni að vera byggt á fjölskyldugrunni en hugmyndafræði og gildi fyrirtækisins taka fyrst og fremst mið af góðum ytri og innri samskiptum þar sem samvinna, þátttaka og teymisvinna gegna veigamiklu hlutverki.

Eigendur og stjórnendur
Núverandi eigendur félagsins eru hjónin Helgi Gunnarsson og Brynhildur S. Björnsdóttir og Brynja Blanda Brynleifsdóttir, fjármála- og aðstoðarframkvæmdastjóri félagsins síðan í upphafi árs 2020.

Starfsemin
Árið 2020 var félagið á meðal 250 stærstu fyrirtækja á Íslandi. Félagið starfar bæði sem aðalverktaki fyrir aðra framkvæmdaaðila og sem uppbyggingar- og söluaðili eigin verka. Hlutverk GG Verk er að byggja vönduð mannvirki sem byggð eru innan tilskilins tímaramma – af framúrskarandi fagmennsku. Lögð er rík áhersla á að setja fólk ávallt í fyrsta sæti, sýna ábyrgð í verki og tryggja áreiðanleika með fyrirhyggju.

Gæðavottun og viðurkenningar

GG Verk var annar byggingaverktaki á landinu til að hljóta ISO:9001 gæðavottun árið 2015 og hefur BSI á Íslandi tekið út gæðakerfið árlega síðan og staðfest vottunina ár hvert. Með vottuninni og gæðakerfinu er lögð rík áhersla á virkt innra og ytra eftirlit, skilvirkni, tímastjórnun, gæði og öryggi. Gæðamarkmið eru mæld reglulega og innra eftirlit er hluti af reglulegri starfsemi.
Árið 2020 hlaut fyrirtækið viðurkenninguna Jafnvægisvogina frá FKA, enda rík áhersla lögð á jafnvægi kynja í stjórn og ráðningum almennt. GG hefur einnig hlotið viðurkenningar og vottanir fyrir að vera Framúrskarandi fyrirtæki frá Credit Info og Fyrirmyndarfyrirtæki frá Viðskiptablaðinu.

Aðsetur og mannauður
GG Verk hóf byggingu á eigin skrifstofu- og lagerhúsnæði að Turnahvarfi 4 í Kópavogi árið 2018 og flutti sig þangað á vormánuðum 2019. Á árinu 2020 störfuðu um 60 starfsmenn hjá félaginu og nokkrir tugir undirverktaka. Starfsfólk GG starfar víða á höfuðborgasvæðinu við framleiðslu á mannvirkjum en skrifstofuhúsnæðið nýtist þó öllu starfsfólki GG sem samkomu-, funda- og þjálfunarmiðstöð félagsins.

Verkefnin
GG Verk hefur byggt yfir 1000 íbúðir frá stofnun og fjölmörg atvinnuhúsnæði. Á árinu 2020 var félagið í ýmsum verkefnum en má þó helst nefna verklok á burðarvirki 330 íbúða á RÚV reitnum í Efstaleiti, íbúðarkjarna fyrir 50 ára og eldri á gamla Kaupfélagsreit Mosfellsbæjar, aðalverktöku í uppbyggingu á Íþróttamiðstöð Fram í Úlfarsársdal og stóran íbúðarkjarna í Dalbrekku, Kópavogi.

Samfélagsmál
GG Verk lætur samfélagið sig varða og var aðalstyrktaraðili Knattspyrnufélagsins FRAM á árinu 2020 og gullstyrktaraðili Rynkeby liðsins.

Gildi og leiðarljós GG Verk.