[searchwp_form id=3]
Árið 2025 náði verkefnið út fyrir landamæri Íslands í samstarfi við Norrænu ráðherranefndina, þar sem herferðin var kynnt á Norðurlöndum undir heitinu „Harmless?“. Með þessu var lögð áhersla á að öráreitni er alþjóðlegt vandamál sem krefst sameiginlegrar vitundarvakningar.
Jafnréttisstofa, frá vinstri Katrín Björg Ríkarðsdóttir framkvæmdastjóri og Úlfhildur J. Ásdísar Þórarinsdóttir rekstrarstjóri.
Útgefandinn ásamt Katrínu Björg Ríkarðsdóttur, framkvæmdarstjóra, og Úlfhildi J. Ásdísar Þórarinsdóttur, rekstrarstjóra Jafnréttisstofu í tilefni útgáfunnar.
Árið 2023 var verkefnið stækkað með samstarfi við Samtökin 78, þar sem áherslan beindist að hinsegin fólki og þeirri öráreitni sem það verður fyrir. Sama ár hófst einnig samstarf við Þroskahjálp, með áherslu á öráreitni gagnvart fötluðu fólki, svo sem barnvæðingu og ableisma. Verkefnið tók einnig til erlendra kvenna og annarra jaðarsettra hópa í samstarfi við samtök á borð við Hennar rödd.
Árið 2022 hófst vitundarvakningarverkefnið „Meinlaust?“ sem Jafnréttisstofa stendur fyrir. Markmiðið er að vekja athygli á öráreitni, hversdagslegum athugasemdum eða hegðun sem virðist meinlaus en getur verið niðrandi og haft neikvæð áhrif á jaðarsetta hópa. Verkefnið hófst með áherslu á kynbundna og kynferðislega áreitni og tengsl hennar við hugmyndir um karlmennsku, mörk og samþykki. Frásagnir úr raunveruleikanum eru settar fram í myndasögum sem birtast á samfélagsmiðlum, og almenningur er hvattur til þátttöku undir myllumerkinu #meinlaust.
Starfsfólkið, myndin tekin í september 2018. Frá vinstri: Katrín Björg Ríkarðsdóttir, Úlfhildur Jóna Þórarinsdóttir, Hugrún R. Hjaltadóttir, Hjalti Ómar Ágústsson, Arnfríður Aðalsteinsdóttir, Fríða Rós Valdimarsdóttir, Jón Fannar Kolbeinsson, Kristín Ólafsdóttir og Tryggvi Hallgrímsson.
Veggspjald Jafnréttisstofu 2019 var sent fyrirtækjum, stofnunum og sveitarfélögum í þeim tilgangi að minna á skyldur atvinnurekenda til að koma í veg fyrir einelti, kynferðislega áreitni, kynbundna áreitni og ofbeldi.
Veggspjald Jafnréttisstofu 2020 var ætlað til þess að vekja athygli á jafnréttislöggjöfinni.
Jafnréttisstofa hóf starfsemi í september árið 2000. Stofnunin annast stjórnsýslu á sviði jafnréttismála og heyrir undir yfirstjórn forsætisráðherra. Jafnréttisstofa hefur eftirlit með framkvæmd laga um jafna stöðu og jafnan rétt kynjanna nr. 150/2020, laga um jafna meðferð óháð kynþætti og þjóðernisuppruna utan vinnumarkaðar nr. 85/2018 og laga um jafna meðferð á vinnumarkaði óháð kynþætti, þjóðernisuppruna, trú, lífsskoðun, fötlun, skertri starfsgetu, aldri, kynhneigð, kynvitund, kyneinkennum eða kyntjáningu nr. 86/2018.
Markmið
Samandregið má segja að markmið jafnréttislöggjafarinnar sé að vinna gegn mismunun og koma á og viðhalda jafnri meðferð, jöfnum tækifærum og jafnrétti. Öll lögin kveða á um skýrt bann við mismunun og gera kröfur til atvinnurekenda um markvissa vinnu innan fyrirtækja og stofnana sem og samfélagsins alls.
Hlutverk Jafnréttisstofu skv. lögum er að: Hafa eftirlit með framkvæmd ofantalinna laga.
Sjá um fræðslu og upplýsingastarfsemi á sviði jafnréttismála.
Veita ráðgjöf og aðstoð á sviði jafnréttismála.
Koma á framfæri við ráðherra og önnur stjórnvöld ábendingum og tillögum um aðgerðir til að stuðla að auknu jafnrétti, t.d. um sértækar aðgerðir á sviði jafnréttismála.
Hvetja til virkrar þátttöku á sviði jafnréttismála, m.a. aukinnar aðkomu karla að kynja- og jafnréttisstarfi.
Fylgjast með þróun jafnréttismála í samfélaginu, svo sem með upplýsingaöflun og úttektum og hafa frumkvæði að því að gerðar verði skýrslur, kannanir eða rannsóknir á sviði jafnréttismála.
Vinna að forvörnum gegn kynbundnu ofbeldi, kynbundinni áreitni og kynferðislegri áreitni í samstarfi við önnur stjórnvöld og samtök sem sinna slíkum forvörnum sérstaklega, sbr. lög um jafna stöðu og jafnan rétt kynjanna.
Vinna gegn launamisrétti og annarri mismunun á vinnumarkaði; sérstök áhersla skal lögð á að vinna gegn launamisrétti á grundvelli kyns, sbr. lög um jafna stöðu og jafnan rétt kynjanna.
Leita sátta í ágreiningsmálum sem Jafnréttisstofu berast og varða ákvæði laganna, ef Jafnréttisstofa telur tilefni til.
Vinna gegn neikvæðum kynjaímyndum og neikvæðum staðalímyndum um hlutverk kvenna og karla sem og neikvæðum staðalímyndum byggðum á kynþætti, þjóðernisuppruna, trú, lífsskoðun, fötlun, skertri starfsgetu, aldri, kynhneigð, kynvitund, kyneinkennum og kyntjáningu.
Hafa umsjón með umsýslu jafnlaunavottunar og jafnlaunastaðfestingar, sbr. 9. gr. laga um jafna stöðu og jafnan rétt kynjanna, annast eftirlit með jafnlaunavottun og jafnlaunastaðfestingu, sbr. 10. gr. sömu laga, og veita jafnlaunastaðfestingu, sbr. 8. gr. sömu laga.
Vinna önnur verkefni í samræmi við markmið laganna samkvæmt nánari ákvörðun ráðherra.
Aðsetur og mannauður
Í árslok 2020 voru starfsmenn Jafnréttisstofu átta talsins, fimm konur og þrír karlar. Jafnréttisstofa er til húsa að Borgum við Norðurslóð á Akureyri. Framkvæmdastjóri er Katrín Björg Ríkarðsdóttir.
Jafnréttisstofa
Atvinnugreinar
Upplýsingar
Lesa bókina
