[searchwp_form id=3]
Á árinu 2025 hélt skólinn áfram á sömu braut og naut aukinnar viðurkenningar. Nemendafjöldi hélt áfram að aukast og meirihluti þeirra stundaði fjarnám, sem er einn af hornsteinum námsframboðsins. Í lok árs fór fram hátíðleg útskrift þar sem rúmlega sjö hundruð nemendur höfðu þá brautskráðst frá skólanum frá upphafi. Á árinu hlaut skólinn einnig evrópska viðurkenningu fyrir nýsköpun í kennslu fyrir verkefnið sem tengdist innleiðingu heimsmarkmiðanna í allt skólastarf, sem staðfesti sterklega þá vegferð sem skólinn hefur verið á. Haustið einkenndist af mikilli ásókn í nám og áhuga á bæði fjarnámi og staðnámi. Í október heimsótti mennta- og barnamálaráðherra skólann til að ræða nýtt skipulag framhaldsskólastigsins og fá sjónarmið kennara, nemenda og starfsfólks.
Árið 2024 var mikilvægt tímamótár í sögu skólans þar sem fagnað var fimmtán ára afmæli. Fyrri hluti ársins einkenndist af uppbyggingu skólasamfélagsins, undirbúningi nýs skólaárs og símenntun kennara. Áhersla var áfram á þróun náms, notkun upplýsingatækni og gervigreindar, auk þess sem fjölmörg erlendu samstarfsverkefnin héldu áfram. Um vorið brautskráðust fleiri nemendur en nokkru sinni fyrr og markaði það áframhaldandi vöxt og aukna þátttöku í námi. Í apríl heimsótti forseti Íslands nemendur og starfsfólk sem tóku þátt í sameiginlegu UNESCO‑verkefni með erlendum gestum, sem undirstrikaði alþjóðlega þátttöku skólans.
Á árinu var áherslan að mestu lögð á alþjóðleg verkefni og samstarf, bæði í gegnum Erasmus- og Nordplus‑áætlanir. Nemendur tóku þátt í ferðalögum og verkefnum erlendis og skólinn tók á móti gestum frá öðrum löndum. Á sama tíma var unnið stöðugt með heimsmarkmið Sameinuðu þjóðanna í öllu skólastarfi, þar sem mannréttindi, umhverfismál og friður voru í forgrunni. Nám og kennsla héldu áfram að byggjast á samþættingu stað- og fjarnáms og þeirri nálgun sem hefur verið þróuð innan skólans, þar sem fjölbreytt verkefnamiðuð vinna, sköpun og ábyrgð nemenda eru lykilatriði.
Sápuboltamót með Grunnskóla Fjallabyggðar. Ljósm. Gísli Kristinsson.
Nemendur í sjósundsnámi í útivistaráfanga. / Ljósm. Gísli Kristinsson.
Lára Stefánsdóttir, skólameistari. / Ljósm. Gísli Kristinsson.
Borið á gönguskíði í fyrir nemendaferð. / Ljósm. Gísli Kristinsson.
Listsýning í lok annar. / Ljósm. Gísli Kristinsson.
Menntaskólinn á Tröllaskaga. / Ljósm. Gísli Kristinsson
Einkunnarorð Menntaskólans á Tröllaskaga eru frumkvæði, sköpun og áræði. Frumkvæði vísar til frumkvæðis í kennslu og að nemendur tileinki sér frumkvæði. Sköpun vísar til skapandi hugsunar, að hugsa í lausnum og fara ótroðnar slóðir. Áræði vísar til þess að skólinn – nemendur og starfsfólk – hafi þor til þess að fara óhefðbundnar leiðir í skólastarfi. Menntaskólinn á Tröllaskaga er í Ólafsfirði. Skólinn var settur á stofn árið 2010 og hefur frá byrjun markað sér sérstöðu í kennsluháttum, viðfangsefnum og skipulagi sem hefur virkni og sjálfstæði nemenda að leiðarljósi.
Námið
Menntaskólinn á Tröllaskaga leggur áherslu á sköpun – menningu og listir – og taka allir nemendur skólans áfanga í listum. Í samræmi við einkunnarorð skólans er áhersla á nýsköpun og var skólinn fyrstur framhaldsskóla til þess að taka upp skylduáfanga í nýsköpunar- og frumkvöðlamennt sem hefur verið kallaður Tröllaskagaáfanginn. Í áfanganum kynnast nemendur atvinnulífinu frá ýmsum hliðum og fá fjölda fyrirlesara, m.a. stjórnendur fyrirtækja og stofnana, í heimsókn. Menntaskólinn á Tröllaskaga er þriggja ára framhaldsskóli til 200 eininga stúdentsprófs og hafa allar námsbrautir sama fjölda eininga kjarnagreina til stúdentsprófs. Boðið er upp á nám á sviði félags- og hugvísinda og náttúruvísinda en einnig í listljósmyndun, skapandi tónlist, íþróttum og útivist. Á opinni kjörnámsbraut gefst nemendum kostur á að setja saman nám sitt út frá sérhæfingu og áhugasviði. Starfsbraut er við skólann.
Gerð er krafa um að allir nemendur Menntaskólans á Tröllaskaga séu með eigin fartölvur sem undirstrikar mikilvægi upplýsingatækni í skólastarfinu og sjálfstæði nemenda. Námið er skipulagt í vikulöngum lotum og verkefni og símat kemur í stað prófadaga.
Fjöldi nemenda
Nemendum hefur fjölgað stöðugt frá fyrstu önninni haustið 2010. Þá voru 73 nemendur skráðir við skólann en á vorönn 2021 eru þeir yfir fimm hundruð. Grunngildi skólastarfsins hafa í öllum meginatriðum verið þau sömu frá byrjun en stóra breytingin hefur verið sú að fjarnemum hefur fjölgað verulega en nemendum í dagskóla hlutfallslega fækkað. Á vorönn 2020 voru átta af hverjum tíu nemendum Menntaskólans á Tröllaskaga fjarnemar, með búsetu um allt land og í útlöndum.
Rekstur skólans
Í tíu ára sögu Menntaskólans á Tröllaskaga hefur rekstur hans gengið vel og starfsmannavelta verið lítil. Árin 2015, 2016, 2017 og 2019 var hann efstur í útnefningu stofnunar ársins í flokki meðalstórra ríkisstofnana, þar sem starfsmenn eru 20-49, og í öðru sæti árin 2014 og 2018. Val á stofnun ársins byggir á mati starfsmanna og er m.a. horft til starfsanda, trúverðugleika stjórnenda, launakjara, sjálfstæðis í starfi, vinnuskilyrða, sveigjanleika vinnu og ímynd stofnunarinnar.
Skólinn
Skólinn hefur tekið virkan þátt í erlendum samstarfsverkefnum, bæði nemendur og kennarar, og víkkað þannig út sjóndeildarhringinn. Menntaskólinn á Tröllaskaga er mikilvæg stofnun fyrir Fjallabyggð. Auk atvinnusköpunar er það samfélaginu dýrmætt að nemendur á framhaldsskólaaldri geti sótt menntun sína í heimabyggð. mtr.is
Menntaskólinn á Tröllaskaga
Atvinnugreinar
Upplýsingar
Lesa bókina
