Múlalundur vinnustofa SÍBS

2025

Stöðugleiki og styrkur

[acf_repeater_gallery repeater="company_timeline" gallery="section_images"]

Árið 2025 markaði áframhaldandi stöðugleika og faglegan styrk. Starfsemin hélt áfram við Reykjalund þar sem framleiðsla, þjónusta og vefverslun mynduðu öflugan grunn daglegs rekstrar. Múlalundur hélt áfram að skapa störf og tækifæri fyrir fólk með skerta starfsorku og bjóða upp á sveigjanleg vinnuskilyrði sem henta mismunandi þörfum einstaklinga. Áherslan var á að viðhalda fjölbreyttu vöruúrvali og þjónustu, og áfram sátu félagsleg markmið og mannauður í fyrirrúmi, í samræmi við markmið eiganda vinnustofunnar, SÍBS. Með þessum hætti hélt Múlalundur áfram að vera mikilvægur samfélagslegur vettvangur og traustur vinnustaður sem hefur haft jákvæð áhrif á líf fjölda fólks.
2024

Tímamótaár

Árið 2024 varð síðan tímamótár í sögu vinnustofunnar. Í mars voru kynntar breytingar á rekstrarfyrirkomulagi sem miðuðu að því að styðja fleiri starfsmenn með skerta starfsgetu til þátttöku á almennum vinnumarkaði. Þrátt fyrir þessar breytingar var staðfest að Múlalundur héldi áfram að sinna lykilhlutverki sínu sem starfsstöð fyrir fólk með sérþarfir. Í maí sama ár fagnaði vinnustofan 65 ára afmæli sínu, þar sem farið var yfir langa og merka sögu hennar allt frá stofnun árið 1959. Fjöldi fólks hafði starfað á Múlalundi í gegnum tíðina, og á þessum tímamótum var lögð áhersla á gildi starfsendurhæfingar, sveigjanlegs vinnutíma og fjölbreyttra verkefna sem hafa verið kjarninn í starfi vinnustofunnar í áratugi.
2023

Fjölbreytt verkefni

[acf_repeater_gallery repeater="company_timeline" gallery="section_images"]

Árið 2023 einkenndist af lifandi starfsanda og fjölbreyttum verkefnum, þar sem áhersla var á að skapa öruggt og uppbyggilegt vinnuumhverfi. Fjöldi einstaklinga fékk tækifæri til að starfa við hagnýtan iðnað og þróa starfsgetu sína á eigin forsendum, og samfélagið í kringum vinnustofuna sýndi áfram mikinn stuðning.
2022

Samantekt úr Ísland 2020, atvinnuhættir og menning

Glaður hópur starfsmanna á Múlalundi.

Oddur Vífilsson við vinnu sína á áletrunarvél í framleiðslusal Múlalundar.

Úr verslun Múlalundar.

Egla möppur sem framleiddar eru á Múlalundi.

Múlalundur vinnustofa SÍBS er verndaður vinnustaður, staðsettur á lóð Reykjalundar í Mosfellsbæ. Múlalundur hefur verið rekinn af SÍBS frá því 1959, með það að markmiði að bjóða upp á vinnu fyrir þá sem ekki stendur til boða vinna á almennum markaði vegna skertrar starfsorku af ýmsu tagi. Múlalundur er aðili að Samtökum atvinnulífsins, Samtökum iðnaðarins og Hlutverki, samtökum um vinnu og verkþjálfun, samtökum vinnustaða fatlaðs fólks víða um land.

Starfsfólk og rekstur
Um 45 starfsmenn vinna á Múlalundi, þar af um 35 manna fjölbreyttur hópur öryrkja. Tækifæri á Múlalundi fyrir fólk með skerta starfsorku geta verið tvíþætt, annars vegar launuð langtímastörf og hins vegar fjögurra vikna starfsprufur þar sem einstaklingar fá tækifæri til að æfa sig á vinnumarkaði, oft í fyrsta skipti eða eftir langa fjarveru vegna fötlunar eða sjúkdóma.
Múlalundur er fjármagnaður annars vegar með sölu á vörum og vinnu og hins vegar í gegnum þjónustusamning við hið opinbera. Þá hefur Happdrætti SÍBS verið fjárhagslegur bakhjarl Múlalundar frá árinu 1959.

Starfsemi og framleiðsla
Á Múlalundi er starfrækt glæsileg verslun með fjölbreyttar vörur og á vefsíðu fyrirtækisins má finna öfluga vefverslun. Múlalundur selur eigin framleiðsluvörur, verkefnavinnu og aðkeyptar vörur. Aðkeyptar vörur koma frá innlendum birgjum og frá eigin innflutningi. Megináherslan er á fjölbreyttar skrifstofuvörur, en einnig umhverfisvæna bréfpoka, íþróttavörur og ýmsar vörur fyrir heimilið.
Verkefnavinnan samanstendur af fjölbreyttri flóru verkefna; pökkunum, strikamerkingum, flokkunum, talningum og fjölmörgu fleiru fyrir viðskiptavini.
Framleiðsluvörur Múlalundar hafa í áratugi að stórum hluta verið fjölbreytt úrval mappa og plastvasa af ýmsu tagi. Egla bókhaldsmöppur hafa um áratugaskeið verið vinsælasta vara Múlalundar og verið leiðandi á markaði. Vörumerkið Egla á upphaf sitt á Múlalundi og er heitið tekið úr Egilssögu Skallagrímssonar. Aðrar framleiðsluvörur má nefna fjölbreytt úrval matseðlakápa, fermingarmöppur, töskumerki, merktar músarmottur, plastvasa í sloppa fyrir sjúkrastofnanir, skólavörur, gyllingu á dagbækur og margt fleira sem skapar mikilvæga vinnu á Múlalundi.

Framtíðarsýn
Starfsemin mun á næstu árum einkennast af nýsköpun í því skyni að hafa næg verkefni fyrir okkar duglega starfsfólk og treystir Múlalundur á samfélagslega ábyrgð viðskiptavina.
Múlalundur hefur frá árinu 1959 verið rekinn af SÍBS, með stuðningi Happdrættis SÍBS. Frá því starfsemin hófst hafa þúsundir einstaklinga með skerta starfsorku fengið annað tækifæri og blómstrað á ný á Múlalundi. Þá vinna allir!