Kjartan Halldórsson fyrrum sjómaður stofnaði Sægreifann árið 2003. Í upphafi var þetta fiskbúð, þar sem hann seldi ferskan fisk til nærsamfélagsins en fljótlega byrjaði hann að bjóða ferðamönnum upp á ferskan fisk, sem hann grillaði á grilli fyrir utan búðina. Með tímanum fjölgaði ferðamönnum og hann sá tækifæri í að stækka fyrirtækið og opnaði veitingastaðinn Sægreifann. Frá upphafi hefur Sægreifinn boðið upp á hina frægu humarsúpu, sem var hans eigin uppskrift.

Byggingin
Byggingin sem Sægreifinn er í var byggð árið 1936 og var í mörg ár sjóbúð. Upprunalega kojur, sem sjómennirnir sváfu í, eru enn á efri hæð veitingastaðarins. Frá sjötta áratugnum var hún notuð sem geymsla fyrir net og sem beitingaskúr.
Fljótlega eftir að Kjartan byrjaði með Sægreifann gekk Hörður Guðmannsson (Haddi) til liðs við hann með lítinn hlut í fyrirtækinu og saman gengu þeir í dagleg störf. Veitingastaðurinn varð þekktur fyrir einfaldleika sinn og ferska sjávarrétti.

Ný kynslóð
Árið 2005 gekk Elísabet Jean Skúladóttir til liðs við Sægreifann. Í fyrstu tók hún við stjórn daglegs reksturs, en árið 2011 bauð Kjartan henni að kaupa fyrirtækið, sem hún gerði, en Kjartan var að sjálfsögðu áfram í stöðu sinni sem stofnandi og frumkvöðull. Enda var veitingastaðurinn hans hugmynd og sköpun og Elísabet gaf honum loforð um að hún myndi ekki hverfa frá upphaflegu hugmyndinni, einfaldleika, ferskum fiski og vinalegu andrúmslofti.
Kjartan lést í febrúar 2015 á 75. aldursári og Haddi í október 2016, rétt fyrir 75 ára afmælið sitt.

Upplifun
Við erum viss um að þegar þú kemur inn á staðinn þá finnur þú fyrir nærveru þeirra og orku, þar sem þessi staður var líf þeirra og gleði.