Sigurgeir Svavarsson ehf. er byggingarverktaki á Akureyri. Fyrirtækið var stofnað árið 2003 af Sigurgeiri Svavarssyni, byggingarmeistara og hafa umsvif þess aukist mjög á undanförnum árum. Áður en Sigurgeir stofnaði fyrirtækið hafði hann í áratug starfað í ýmsum viðhalds- og breytingaverkefnum í byggingariðnaði, annað hvort einn eða í samstarfi við aðra, fyrst og fremst í Ólafsfirði og á Akureyri.

Sagan
Eftir stofnun Sigurgeirs Svavarssonar ehf. árið 2003 var Sigurgeir eini starfsmaður fyrirtækisins en það breyttist fljótt með auknum umsvifum og stærri verkefnum. Framan af var fyrirtækið mest í fjölbreyttum viðhaldsverkefnum og endurbótum en á síðustu árum hefur það í auknum mæli byggt og selt nýbyggingar, fyrst og fremst raðhús og einbýlishús. Einnig hefur Sigurgeir Svavarsson ehf. tekið að sér fjölbreytt verk fyrir einstaklinga, fyrirtæki, stofnanir og sveitarfélög. Fram að þessu hefur bróðurpartur verka sem fyrirtækið hefur unnið verið á Eyjafjarðarsvæðinu, að stærstum hluta á Akureyri.

Mannauður
Hjá Sigurgeiri Svavarssyni ehf. starfar öflugur og góður hópur starfsmanna en á árinu 2020 voru fimmtán ársverk hjá fyrirtækinu. Mikill meirihluti starfsmanna eru menntaðir húsasmiðir. Á árinu 2020 kom Þórhallur Másson inn í fyrirtækið sem hluthafi en hann hefur starfað hjá því síðan 2012.

Verkefnin
Nýbyggingar Sigurgeirs Svavarssonar ehf. eru afhentar kaupendum fullfrágengnar. Fyrirtækið hefur haft þá stefnu, ef þess er kostur, að kaupa glugga, hurðir og innréttingar af fyrirtækjum í heimabyggð. Á árinu 2020 voru stærstu verkefni Sigurgeirs Svavarssonar ehf. raðhúsabyggingar við Steindórshaga 12-18, og Halldóruhaga 3 á Akureyri. Einnig hóf fyrirtækið byggingu aðstöðuhúss fyrir Siglingaklúbbinn Nökkva. Verkkaupi er Akureyrarbær.

Sérhæfing
Á síðustu árum hefur Sigurgeir Svavarsson ehf. sérhæft sig og lagt áherslu á byggingu húsa úr krosslímdum timbureiningum. Þessi byggingarmáti er ekki nýr af nálinni á Íslandi en hefur í auknum mæli verið að ryðja sér til rúms á undanförnum árum. Byggingar úr krosslímdum timbureiningum eru vistvænar og hagkvæmar og byggingartíminn er skemmri en í steinsteyptum húsum.