Súperlagnir ehf. var stofnað 10. september 2003. Eigandi og framkvæmdastjóri er Símon Guðlaugur Sveinsson pípulagningameistari. Hann tók sveinsprófið árið 2000 og lauk svo meistaranámi í pípulögnum árið 2008. Súperlagnir hóf starfsemi sína í Kópavogi sem einyrkjafyrirtæki og þá aðallega í undirverktöku og smærri verkefnum.

Sagan
Árið 2005 flutti Símon með fyrirtækið á Selfoss og starfaði þá aðallega á Reykjavíkursvæðinu og Selfossi til ársins 2009. Hlé varð á rekstri fyrirtækisins þegar eigandinn tók að sér starf við pípulagnir á Heilsustofnun í Hveragerði. Súperlagnir tók svo upp þráðinn að nýju árið 2012 og var þá með aðstöðu í bílskúr eigandans, síðan færðist aðstaðan í gám sem hýstu bæði verkstæði og kaffistofu fyrirtækisins. Svo var það árið 2020 sem Súperlagnir eignaðist iðnaðarhúsnæði að Víkurheiði 11 Selfossi. Í dag starfa hjá fyrirtækinu átta starfsmenn og af þeim eru tveir meistarar, tveir með sveinspróf, tveir á samningi og tveir verkamenn.

Þróunin og verkefnin
Þróunin hefur verið mikil í pípulögnum á undanförnum árum og margt breyst til betri vegar. Áður fyrr voru aðalega notuð snittuð rör í hita- og neysluvatn, en í dag eru eingöngu notuð plast fittings eða álpex fittings. Gólfhitalagnir hafa komið í stað ofna í iðnaðar- og íbúðarhúsnæði og allur stjórnbúnaður orðin nákvæmari. Helstu viðskiptavinir Súperlagna er verktakafyrirtækið Smíðandi, Sólheimar í Grímsnesi, Garðyrkjuskólinn á Reykjum í Ölfusi og Selfossveitur og þá aðalega í mælaskiptum á Árborgarsvæðinu. Súperlagnir þjónustar einnig FIT með sumarhús félagsins í Árnessýslu og sér um viðhald í verslunum Samkaupa á Suðurlandi. Einnig taka Súperlagnir að sér allar almennar pípulagnir fyrir einstaklinga og fyrirtæki á Suðurlandi ásamt viðgerðum og nýlögnum á Reykjavíkursvæðinu.

Framtíðin
Vöxtur og velta Súperlagna hefur aukist árlega með vaxandi tækjakosti og stærri verkefnum og fjölgun góðra starfsmanna, sem hefur lagt grunninn að sterkri stöðu og velgengni fyrirtækisins í dag.