Árið 1982 stofnar Björgvin Sigurjónsson Trésmiðjuna Eik ehf. og rekur hana til ársins 2010 en þá verður fyrirtækið gjaldþrota. Björgvinn kaupir þrotabúið og stofnar Tv-verk. Hann rekur það til apríl 2019, hættir þá vegna aldurs og selur Heiðari Jóhannssyni, húsasmíðameistara fyrirtækið, en Heiðar hafði starfað hjá Björgvini alla tíð. Hjá fyrirtækinu starfa nú fjórir í fullu starfi og einn í hlutastarfi. Ásamt Heiðari starfa hjá fyrirtækinu Guðni Ólafsson húsasmíðameistari, Andri Bjarnason sveinn, Guðmundur Björn Þórsson, verkamaður og Kristjana Andrésdóttir, eiginkona Heiðars í hlutastarfi.

Starfsemin
Eins og gengur og gerist á landsbyggðinni þá byggist vinnan á því að þjónusta heimabyggð og næsta nágrenni í öllu sem að byggingum snýr, hvort sem um er að ræða nýbyggingar eða viðhald húsa og annara mannvirkja. Þar sem ekki er eins greiður aðgangur að öllum tegunda iðnaðarmanna úti á landi þurfa starfsmennirnir að vera klárir í hvað sem er og byggja þar með upp dýrmæta reynslu sem nýtist vel.

Verkefnin
Of langt yrði að telja upp allt það sem tekið hefur verið á, en hér á svæðinu höfum við verið í sérstöðu með t.d. gluggasmíði og ekki síst smíði glugga í gömul hús sem við höfum verið að gera upp. Má þar nefna t.d. endurbætur og uppbyggingu í Brautarholti í Selárdal ásamt mörgu öðru. Á verkstæðinu eru fræsarar og samsetningarvélar fyrir glugga sem gera gluggasmíði fljótvirkari og vandaðri en ella. Gott pláss er á verkstæðinu þannig að hægt er að smíða húseiningar inni. Á tíma Eikar ehf. Voru smíðaðar einingar, gluggar og hurðir í fjölda húsa, sem voru svo fluttar suður á land og reistar þar.

Aðsetur
Fyrirtækið er staðsett að Strandgötu 37 á Tálknafirði og er í um 450 fm húsi sem byggt var sem sláturhús í kring um 1954 og var slátrað þar fram til 1981 þegar því var breytt í trésmiðju. Litlu seinna var byggð líkamsræktarstöð og vélaverkstæði. En nú er Tv-verk með allt húsið undir sína starfsemi.

Framtíðin
Ekki hefur verið mikið um nýbyggingar íbúðarhúsa hér, síðast var byggt parhús 2016. En eins og á öllu suðursvæði Vestfjarða er mikill skortur á húsnæði vegna sívaxandi umsvifa laxeldisfyritækja á svæðinu, og horfa menn fram á bjartari tíð hvað varðar uppbyggingu á svæðinu.